Vantirhkoh

      

                    

Zan dar 11:30 a ri ṭep tawh tihah chuan ka thawhna hospital aṭangin ruahsur hnuaiah ka inkhalh haw a. Ka duty hun chhunga damlo ṭum dang zawng aia en tur an tam avangin ka chau zual hle a, tichuan ka inbual zawh hnuin mu turin pindanah ka phei a, ka nupui chu a Bible chhiar lai a mutthluksan a ni tih hriat takin Bible kuahin a lo mu sâk sâk tawh a.

Kan nupui hi ringtu ṭha tak a ni ka ti ve ngam tlat; chutih laiin kei erawh medical student ka nih lai atâ tawh Pathian awm  rinlohna ka nei daih tawh thung. 

Ka nupui pawh hian beidawng lovin min la ṭawngṭaisak fan fan a, ‘engtin emaw Pathian hian a awmzia a la hriattir ngei che hi ka ring tlat’ a ti fo ṭhin a, kei lah chuan ka nuihsan vel mai mai thung ṭhin.

Dar 12:30 a rik dawn velah chuan ka mutui ve ṭan tur chiah chu kawngkhar rawn kik kerh kerh thawm ka hria a. Pheihlo zet a thoin ka va hawng chu naupangtê, huh zawr hnâp hian a lo ding a, “ka pu khawngaihin kan inah lo kal rawh, a nu a damlo nasa lutuk” tiin thaw dêp dêp chung chuan a sawi a. Tichuan keipawh hmanhmawh taka insiamin ruahsur hnuaiah kan inzui ta a.

An in ka luh dawn chuan, “ihh, ka pu lo va lut mai rawh, kan ṭhenawmte ka va ko ve dawn” a ti a, a nu chu a lo nat zual viau ka hlauh avangin naupang pawh chu chhâng lêm lovin ka lut ta nghal vat a. 

Tichuan nutling a âwm dawm a lo let reng hi ka va hmu a, ka theih ang angin kan inbâwihsâwm a, reilotêah chuan a ziaawm ve ta mai a.

A zia deuh tawh avangin kal mai ka tum a, ka kal dawn chuan, “ka pu, ṭhenawm ten an rawn ko che em ni? Ka tibuai tak hle mai che a..” thei leh thei lo hian a ti a. “I fanu kha i rawn tir a ni lawm ni; a fel hle mai, ruahsur hnuaiah a rawn kal vang vang a nia. Ṭhenawmte ka au dawn a ti mai khan ka hre sia, a rei ta hle mai” ka han ti khawmawi hrâm a. A ni chuan mak tak maia min enin, “Doctor engtin maw i sawi a!” a rawn ti thâm ṭiak a.

 Kei chuan lawmthu sawi aia chutiang a ti zawk chu ka ngei ru angreng hle a mahse,  “a…I fanu tê reuh kha a lo let leh har ka ti deuh a…a fel rêng rêng e” ka'n ti nem leh thei hrâm a. Chutah mittui tling kuau chungin, “Doctor, ka fanu chu nikum khan a boral tawh a lawm” a ti ta mai! Ka bangbo ngei mai.

Chutah a kum zat leh a pianphung ka'n zawt leh hrâm a, kan in khawngka bula huh zawr vek a lo ding naupang ang chiah kum âwm ang leh pianphung chu min hrilh leh ta nghal a. Ka rilru a buai ta nak mai.

Chutia rilru buai taka ka awm lai chuan chu nu chu a rawn ṭawng chhuak leh a, “Ka pu, i sawi chu a dik ang. Ka fanu kha a fel thei teh asin; kan pahnih chauh a awm kan ni bawk a, kawng engkimah min puiin a theih ang tâwk tâwk hi a lo ti ve ṭhin a, fiamthu hian, ka vantirhkoh tê Pathian min pek i nih hi te ka ti ṭhin a, a ṭhih hnu pawh hian Pathianin ka tân vantirhkoh a la nih tir zel a nih dawn hi. I lo kal hmâ zawng khan ka thi mai dâwn emaw ka ti hman a, ka fanu awm se aw ti rilru chungin ka ṭawngṭai mawlh mawlh asin” a ti a, a hmelah chuan lungchhe mittui leh hlimna mittui a luang kawp ni hian ka hria.

Chumi zan aṭang chuan tih danglamin ka awm a, ka nupui ṭawngṭaina chhânin a awm a, a thusawi ṭhin te kha a lo thleng ta a ni hi!

 

“I kawng tinrênga humhim tûr chein, i chung thuah zawng a vantirhkohte chu thu a pe dâwn si a”~Sam 91:11