Letter

5 Nov, 2025

Nau, 

Ka la hmangaih kham lo che a, ka la hmangaih zo lo che. Duata, dawm chein, duh zual zel che ka la hmabak asin. Pêk leh hlan tûr che, hruai chhuahna tur che leh hmuhtir duh che tam tak ka la nei a, i duhthusam thilte i tihhlawhtlin theih nana i kianga i kut chelhtu nih ka la duh asin; thil tam tak, nau, thil tam tak i tan tih ka duh.

Manganga i awm hunah thlamuan che a, i hah leh chauh chânga chawlhna pek che a, i hmabak hlen chhuak thei tura fuiha puih che ka duh a. I lunglênna hnawt bo tura zan rei pawh sawi lova lo thawh chhuah fo ka la duh a, zawi tê têa titi leh melh melhin, fiamthu ho lam tê tê sawia, nuih rik insûm tak chunga zan tum tawi dun leh ka la duh a. Zawlkhawpui daifêma cafe kil khatah, nang nena ṭhuthmun rema, mi dang che vel thlir pahin kan duhthusam thilte leh kan hlauhthàwn thilte, kan beisei thil te leh kan beidawn tawhna te, thil ropuite leh thil hopuite sawi leh ila, coffee tui tak leh hmangaihna tui tak chu tem kawp leh ila ka châk asin. 

Zoram favang nuam tak hi i kianga hman ka la châk fan a, hunpui leh sikpui lo inher chhuak tur mawlh mai hi nang nena hman leh ka duh asin. Van zawla Lailen sava ten thla zâra zalèn taka hun an hman ang hian, nang nena thlasik boruak hi chen leh ka duh a; tlai ni nèmah, tlai ni tla mawi êm êm maite hi nang nena thlir dun ka duh asin. Van râng chhûm kara ni zung êng thlur sung mai leh sik thlifim tleh heuh heuh karah i kut chelh lumin, khawvel mawina infâwkkhâwm mêk thlir chungin ngawi renga hmangaihna thu hlan che ka duh a ni. 

Engkima lungawi thiam tak i nih hre chung sia ka theih anga ṭha ber thil tihsak che a, zawnsak che a, pêk che ka la kham lo va. Duata, dawi ang dawm chein, i duhawmna dawn ka la châk a; i mawina mangphan a, tak rama i mawina tem bâng si lo kha nih leh ka duh a; i nunhlui pawmtu, tun huna chelhtu che leh hma hun i thlirpui mihring kha nih ka la duh a ni.

Eng vangin nge, eng vang teh kherin nge nang nen zinkawng hrang kan zawh a ngaih ni? Nang ka chàn chhan tur che leh i kal bo a ngaih chhan tur chhan ṭha leh tluantling ka la hmu ve mawlh lo ve.

Nau, ka la hmangaih kham lo che a, ka la hmangaih zo lo che.