Knowing You'll Be There

Kum dang ang bawkin thlasik khaw vawt tak karah mi tam tak hunpui lo thleng tur atan inbuatsaihin an phu mur mur a, a ṭhen buai em em anga an lan rualin, mi zawng zawng chu an phurin an hlim em em vek emaw tih turin an che sung sung a. Kei erawh chu ka tih tur ṭul te ngaihtuah lem lovin, chêngkawl hniak chhiara kalin mipui che vel chu ka thlir kual a. 

Chutah hmun pakhat ka va pawh a, chu hmun ka thlen rual rual chuan ka rilruah i lo lang nghal vat a, phur takin ka awmna hmun hrilh tur chein ka phone ka dap nghal ruai a, mahse ka phone ka lak chhuah rual rual chuan thil pakhat ka theihngilh leh tawh a ni tih ka hre chhuak a: hetah i awm tawh lova, thlamuang takin Pathian hnenah i chawl tawh a ni tih chu. Ni e, a la harsa deuh a ni mahna; ni leh thla tam a liam hnu paw'n ka hnenah i la awm emaw tiin biak ka la tum fo che a, hmuh tum chein ka tei chhuak leh ṭhin a, zing leh zanah ka mangphan nawn fo che asin! 

Ka phone ka ipetêah ka dah lêt a, he hmun hi nuam i tih theihzia ka hriatchhuah avang a ni ang, i awm tawh lo tih ka lo theihngilh leh hman ni! Hetah la awm la chuan ni dang ang bawkin nuam i tih avangin rei ngial kan tei kual leh ngei awm si a. Kum dang ang bawkin mawlmang tak, mahse mawi tak siin an chei ve a, kil tin mai chu a êng de sep sep a, mipui che vel rimawia lo awi tâwk an awm bawk. Taka, kumin chu Tlaizawng kung pawh kha an chei a, a par senno chek kha a mawi zual teh asin! 

Han hawi vel ila, engkim mai hian ka lung a tilêng a, keimahah hian kim lo eng emaw awm tlat hian ka hria a, ka inkhai bawr ve tehlul nen, ka ruak huai mai. Kan pahniha he lai hmuna kan kal hnuhnung ber hun kha mitthlaah a lo lang a, awm ve ni la, tunah te hian hlim takin i nui sen sen ang a, fiamthu ṭharailo tê tê sawiin i titi leh siam siam âwm si a. Mahse tunah chuan a hma aia nung lehzual turin min thihsan a, a hma aia hlim lehzual turin lungngaihna leh thihna ruam chu i paltlang tawh si. 

Thlasik rualin khêl lovin Krismas a lo inher chhuak a, heng hunah mawlh hian a ni nang ngaih a zual ṭhin ni. Mitthlaah leh mang lamah ka hmu âwl lo che a, dul raiha sikni lo êng chuan hriatrengna rawng thar a rawn hnawih ṭhin a, sikthli fim te hian i zûn an keng tel tlat hian ka hre ṭhin.

 Kan sulhnute ka thlir kir a, Krismas thilpek kan inpek lai te khan nang chu naupang ang maiin thilpek engpawh mai kha i hlimpuiin i lo lawm thiam em em zel a, ka tân erawh i hlim hmel ngawt pawh kha thilpek hlu tak a tling. I bulah chuan engkim a nuam a, engkim a mawi a, engkim a hlu zual ṭhin. 

Mahse tunah zawng hei hi hringnun a nih miau avangin thihnain min ṭhen hrang tawh a ni tih pawm thiam ka zir nawn fo a, mahse Pathian avangin thihna hian min ṭhen hlen dawn lo a ni tih erawh chu ka theihngilh ngai lovang. Nangmah avang hian chu hmun nuam chu thlen hlan ka nghakhlel zual a, tah chuan mi lo hmuak dawn a ni tih ka hria a, chu hmun nuam kan panna kawng hi bumboh viau ṭhin mah se, chu hmun Siamtu avang leh nang ka tâwk leh dawn che a ni tih ka hriatna hian a hma zawng aiin chu hmun pana ka pheichheh khai a tizãngin a ti nuam a, harsatna karah pawh chu hmun thlir chung chuan hmatiang sawn zai ka rel leh hrâm hrâm ṭhin. 

Kan nitin nun buai tak karah, tih tur ṭul tia kan phêk buai karah hian, ka thinlung kila awm chu lo inlar nawnin engtin emaw tak ka bul hnai maiah i awm anga hriatna ka nei nawn fo a, chung hunahte chuan hriatrengna leh lunglênna an lo thawk kawp a, hmana min lo kuangkuah ṭhin ang khan vawi khat chauh min lo kuangkuah leh la ka ti vawng vawng ṭhin.

 Mahse engtik niah emaw chuan hlim takin kan inkuangkuah leh dawn tih ka hria a, i nui hmel mawi tak kha hmu lehin leia kan sulhnu kan chhui ang a, lungmuangin nang nen Siamtu'n kan tâna hmun a buatsaihah chuan kan chawl hlen dawn a ni tih ka inhrilh nawn changin, lungngaihna leh lunglâwmna ka tem khawp a, ka mit atâ lawmna leh lungngaihna mittui a lo luang chhuak ṭhin. 

Nakinah, hun awm loh hunah, thihna leh ṭahna, lungngaihna leh lunglênna te'n mual an liam hunah, chu hun ngeiah chuan nang leh Chhandamtu'n min lo hmuak ang a, thawnthu leh mumang ang mai a an sawi ṭhin hun leh hmun nuam chu a takin kan chên dun ang. Chu hun a lo thlen hma loh zawng, Siamtu'n a buatsaih hmun nuamah ka tâwk leh dawn che a ni tih hriatna nen hian hmalam ka pan zel na'ng e. 

"I see you most at Christmas

You were like a little kid, 

You always loved a good surprise

And now I must admit

That I long more for Heaven than I ever did before

You gave me one more reason

And each day I want it more.

Knowing we can spend a lifetime

Reminiscing on the past 

Knowing I will see your face again

Where tender moment last

It makes me want to go there

Knowing I won't be alone

Knowing you'll be there

Makes it easy to go home."