Ni Tla Tur

Kâwlah vangpui turni a her ruai ruai a, tlâng leh mual, van boruak leh vanrâng chhûm, mit tlin tâwk apiang chu a chhun sên phût a; sik thlifimin thler tin hrutin a fang a, virthli lêng sir sâwnpuiin vamur leh lailên te'n thla zarin boruakah nun chan an zir a, a mawina zawng zawng nena turni kâwlrâwna nem pil a nih lai mêkin, van laiah thla fang ki fiah lo riaiin a lo lang ve bawk a. 

Chutih lai, khawvel hò tak leh nun rawng takin a mawina neih zawng zawng a chhuah lai hun tawi têah hian, buaina buan a, thlen tik awm lo naktuk thlira an vawiin nî hmang zo ṭhin mihring sang tam Zawlkhawpui tualah an insul pel sup sup a, chung zinga mi tlêm tê chauh chuan kâwlkilah hun tih din a nih lai an hmu thiamin, an thil tih lai chawlhsan meuhin an ding a; an nitin khawsak buaina atâ thâwk lâkna hun ṭha a nih hriain, mawina man to a thlâwna Khuanu'n a pêk chu thlir turin hun an insiam phal a ni. 

Kâwlkil chu thlirin tlai tla êng mawi chuan an chhungrila khawharna thûk tak leh, thinlung ruak, reh leh riang nei chung si a sawi fiah theih loh phurrit an phurh chu, kâwlrâwna turni mual lian mêk chuan a lo bun chhuahsakin, chu tlai ni tla mawi tak chuan an thinlung a chawi sâng ṭhin. 

Thinlung hnîm leh hlim tak siin kâwlkil an thlir vawng vawng a, hringmi kutin a siam loh mawina zûn zâmah chuan kan dam chhan leh nun awmzia inphân ruak mai chu an hmu thiam bik a, awmze nei lo nun leh khawvelin awmzia a neih ve lai ber hun a ni tih an hre thiamin, rei lo tê atan natna leh khawharna kiam si lovin 'vanram' an chên ṭhin. 

Heng mi te hi an ni, 'thlarau mi' dik tak chu; biakbûk ropuia lamtual mawitu te thlarau chan aia sang daih, hringnun hriat thiamna ril tak chu he hun tawi têah hian an chang ṭhin. 

He hun, kâwlkila ennawm mawi leh ropui chhuah a nih hun lai hi chhungrila khawharna leh an nun ruak tak an hlimpui ve thei hun awm chhun a ni a; natna a mawina, thi si lova hahdam taka nun an vui liam theih hun chu. 

A ni dâwn rêng asin, mawina makna hi a tak a, khawvel siam tirh atâ Khuanu'n khuarel thil nena inzawm tura a duan kan nih avang hian, he kan nun buai tawh tak kara mawina tem tura inpe phal apiangte'n khuarel mawinain a pêk hahdamna hi an chang ṭhin.

Chung mite chuan khawvel mawiin hla mawi a pêk hi mihring ṭawnga lo let chhuakin, thuhlaril mawi leh ropui a pian phah fo chu a nih hi! 

Kei pawhin kâwlkila khawvel mawina infâwkkhawm ka en mek lai hian, chuaia chul a, chawlhnaa chatuana pêm bo turin engtik nîah emaw chuan he tlai tla êng mawi hian ka nun a la tlâkpui ve dawn tih ka ngaihtuah a, vuiin ka ngui lo ve; mahse sawti'ang sâw'n, sawti'ang ngei saw'n, mawi leh muanawmin her liam ve ka duh a ni. 

"As you fade in the skylines

you paint the sky all in red

and for awhile my demons are dead. 

Here the day and night are intertwine, 

you embrace all my mess

and my trouble all at rest. 

Here all my pain are gone with the wind

and all the sadness freeze

and keep my heart at ease. 

I come with all my sorrow

but in your light i lay it all

then you always lift me up in your fall."

 ~gba