Siamthar Lehtu Pathian

“Engkim hi an hun ṭheuhvah chuan mawi takin a siam a”

 ~Thuhriltu 3:11

Huat, hnawn leh hnawl a ni a, a hmangaih leh a ngainat a unaute thinlung chu khâknaa a khah zo tâk avangin a pain duhsak taka a pek, ze hrang hranga cheimawi a kawrfualah chuan thisen leh dâwt an tatkaia, fan ngai loh ram lamah sal nun tem turin a hmangaihte'n an hralh a, chu rawlthar Josefa chuan a kawng zawh mêk chu hriatthiam har a tih châng a va tam dawn em! 

Tânin chhûnga a awm lai leh rim taka hna an thawhtir lai te chuan a rin Pathian chu hla taka awm angin a hre ve ṭhin ngei ang a; Potiphara nupuiin dik lo taka a hêk hnua mualpho leh hrem hmabâka a awm lai te phei chuan, “Lalpa, heng zozai hi eng vanga thleng nge? Engnge ka tihsual?” ti chhuak ve rawng rawng mah se a âwm lo hrang lo ang; mahse a rin Pathian chuan remruatna fel tak nen chhanchhuaktu ropui ni turin a lo buatsaih ru reng zawk si a! 

A unaute rilru sualna chu Pathian remruat a ni vek kher lovang, mahse chu sualnain a nghawng thil pawh chu siamthar lehtu Pathian chuan thil ṭha zawkah chantirin, a hun takah mawi takin a par chhuak a ni. 

A hun lai khawvela civilization ropui ber Aigupta ram finna zawng zawng zir chhuakin rei lotêah Pharaoa lalṭhuthleng luah mai tawh tur khan a thisen zawmpuite an hnuaichhiahna chu tuar thei tawh lovin tual hial a that a. A thil tih avangin thlalerah a tlan chhia a, ram ropui lal fapa ni ṭhin kha beram vengtu mai a lo ni ta. 

Mahse siamthar lehtu Pathian chuan chu tualthattu, mi ṭawnghmang thiam lo leh ṭawngmawh Mosia chu hruaitu ropuiah a chher chhuak leh ta zawk a; a thih dawna Israel fate a thlir lai khan Pathian remruatna lo ropuizia chu a hma aiin a hmu chiang tawh ngei ang. Engkimtitheia’n hun a tih hunah chuan engmahin a dal zo lo, a aia ṭha zawkin a lo par chhuak leh ṭhin. 

An hnam chu milem leh ramhnuai be hnam (pagan) an ni a, Moab mite chu Israelte do ber an lo ni tawh ṭhin. Mahse kha Moab hmeichhia Ruthi kha a rinawmna avangin Isua thlahtute zingah a lo tel tlat. Siamthar lehtu Pathian chuan a lo chhuahna hnam leh ram a thlir lova, eng ang nun nge a lo neih tawh tih ai chuan kha nun aṭanga a thil tih tur kha a thlir zawk a, Engkimtitheia mitah chuan kan lo awm tawh dan ai chuan amah avanga kan awm zel dan tur a pawimawh zawk tlat a ni. 

Greco-Roman hunlai a ni a, Rom lalram hnuaia Greek finna (philosophy) te'n par an chhuan mêk chu tlânin Juda dân zirmi leh mithiam, dânte vawn nghet tum tlat mi, a hunlai chuan Juda zingah pawh ani aia mithiam leh inzir mi chu an tam hauh lovang tih tura mi thiam a ni.

Thangṭhat hlawh nan pawh a ni ang, a hunlaia ‘pawl hnawksak’ an tih Kristiante thenfai hna a thawk a, Stephen-a an den hlum dawn pawhin deng hlumtu te kawr chu phur takin a lo keng a, mahse siamthar lehtu Pathian chuan nun dang ṭha zawk, a do leh a huat Kristianna chi ti ṭiak turin a nun kawng chu a lo ruahman tih rêng a hre si lo. 

A lo suangtuah ṭhin dan ang nun chu Paula chuan a hmang lo a ni mahna, mahse a lo suangtuah ṭhin aia ropui zawkin a nung tih erawh a hriatchhuah châng apiangin, “Lalpaah chuan lâwm fo rawh u: ka ti leh pek ṭhin ang, lâwm rawh u” titu khan hlim takin a nun chhuikir pahin lawmthu ava sawi nasa ṭhin dawn tak em! 

Bible bu pumpui mai hi siamtharna leh dinthar lehnain a khat a, mi sual ber berte kha Pathian tana mi ṭhahnemngai an lo ni a, chhe tawh leh siam ṭhat rual loh anga lang pawh Pathianin hun a tihah chuan engkim fel takin a lo inher rem a; Berampu ni ṭhin kha lal te an ni a, lo neia ei zawngte kha Zawlnei ropui ber ber an lo ni a, sangha mantu te pawh khawvel awm chhung zawnga hming dai leh ngai tawh lo turin Chanchin Ṭha khawnvar chi kaitu, thuhrilhtu ropui an lo ni ta zawk a ni. Engkimtitheia inrawlh tawhna nun hi nun satliah a awm ngai lo asin! 

Hun leh kum liam ta te i thlir kîr a, hlimna hian i nun chu a rawn tlawh zeuh zeuh chauh a ni tih tur khawpin harsatna te'n i nunah bu an khuar nghet tawh a, beidawng duh ni la chuan beidawn a hun daih tawh; beidawng pawh ni la, tu'n an dem lutuk bik lo ang che. Hlimna leh Pathian chu hla taka mi niin a lang a, hun leh kumte vawi tam tak lo thar nawn mah se, i hman mek nun aṭang chuan engmah a thar kumtin si lo. Mahse… ni e, ‘mahse’ tih a la ngai tlat! A chhan chu i rin Pathian hi a beidawng ve ngai lova, hun a tih hunah a rawn che mai dawn a ni. 

A kawng zawng zawng hi kan hriat thiam kher a ngai lo; Abrahama, Josefa, Mosia leh mi dang tam tak khan an hre thiamin an hmu pha vek kher lo, mahse siamthar lehtu Pathian chuan a hun takah chet a thawh a, nun danglam, hun danglam leh ṭha zawk a lo inher chhuak ṭhin. 

“Lalpa ni li lai a liam tawh” tia beidawnna nena an chhâwn hnu pawha Lazara chunga a thiltihtheihna lantirtu Isua kha vawiin hian a la pangngai reng a, awmzia a awm tawh lo kan tih hnuah pawh AWMA chuan awmzia a neihtir fo ṭhin. Zan thim hnuaiah beidawngin indawm kun ṭhin mah ila, engtikah emaw khua a la var ang a, liam tawh sulhnu leh nun hluite chuan min hliam nawn fo mah se, siamthar lehtu Pathian avangin hun tharah nun thar a her chhuak fo ang. 

“Tupawh Kristaa a awm chuan thil siam thar a lo ni a; thil hluite chu a ral ta a; ngai teh u, a lo thar ta”

~II Korinth 5:17