Isua Miziaa Ropui Ka Tih Deuh Chu...

Kan rin leh zui mêk Isua hi tu chiah nge a lo nih a, he khawvela a lên lai khan eng ang mizia nge a neih tih hi kan ngaihtuah ve ngai emaw? 

Mizoten Isua kan ngaihruat dân bik nia ka hriat ṭhin chu, mi zaidam, pa tithluâm mai, damlo leh harsatna khirh tak neite khawngaihtu a nihna zâwn aṭang phei chuan pa ti dêm dêm, nelawm taka mi be thiam, hmêlah pawh hmel ngainatawm tak leh hlim thei tak hmel pu deuh ni tur hian kan suangtuah ṭhin niin a lang a, chu chu thil âwm lo pawh a ni chuang lo. A chhan chu he Isua hi min hmangaih avanga mihringa lo changa, natna leh bawrhsawmna nei mi chi hrang hrang tidama, thlamuana, kraws-a amah khêngbettute ngei pawh ṭawngṭaisaktu Isua kha a ni miau a ni. 

Hemi avang hian ringtu ṭha tak kan mitthla dân pawh mi nelawm pui mai leh ngainatawm, Mizo upain ‘ṭawngkam ṭhain sial a man’ an lo tih aṭanga teh phei chuan a ṭawng chhuah apiangin nula vantlâng man âwm tâwk sial chu a man reng ang tih theih tura ṭawngkam ṭha ui lo mi, mi zaidam leh zawldawh thiam, mi tlâwm, buainaa inrawlh chu sawi loh, buaina zawk pawhin pumpelh tuma a bih ruksan zak zak duh tur mi ang deuhin kan mitthla ṭhin niin ka hria. Chang khalha ṭawng ṭhin leh ti deuh ṭhak ṭhak emaw, che deuh rap rap ṭhin mizia ai chuan kan lo suangtuah ṭhin dân mizia khan Isua mizia âwm tur chu a pâwl deuh zawk ngei ang. 

Amaherawhchu, an sawi Isua hi kan rilru mila kan duan mizia ang duak duak chu a nei chiah lo mai thei; thudik leh thutak auchhuahpui a ṭul hunah chuan tute emaw angin ngawih a chuh daih zel hian ka ring lo. A chhan chu, ‘Isu zaidam leh nunnem’-a khan, temple chhûng chu sumdâwnna hmunpui ang maia an hman tâk dân a hmuh chuan an thil zawrh lai leh pawisa thlengtute dawhkân chu a nam tlu rap rap mai a nih kha. Pathian chatuan remruat chu puanga a zirtirte hnêna a thih tur thu a sawi khan, zirtirte zinga chal lang ber Peter chuan Isua chu hruai hrangin inti fing tak leh ṭawngkam ṭha takin a'n thlamuan vel a, Isua chuan, “Setan, ka hnungah kal rawh” a lo ti zêk a nih kha! A hunah chuan a ṭawngkam a nêm lem lo. 

 Isua miziaa bet tlat chu a huna thil dik lo do ngam tura huaisen taka chet ngamna leh ṭawng chhuah ngamna hi a ni. Chung chuan nun tlâwm leh nun zaidam neitu a nihna kha a thaibo chuang reng reng lo. Mihring mitmei aiin thudik mitmei a vêng zawk a, tisualtu mihring ni lovin sual zawk kha dik takin a do mai ṭhin. Mi nasa leh tawrhhlehawm a ni lova, mahse rilru sual pu tlattu Pharisaite tân kha chuan a tawrhhlehawm ṭhin thung. Inhnialna chawhchhuah a tum ngai lo va, mahse fing kherek taka amah hnialtute chu dik tak leh fel takin a hnial thla fo ṭhin. Thudik tak hmanga hnial lêt ngam lo khawpa nun tlâwm leh dawihzep a ni lo. 

Keini chu a châng chuan, thil dik lo leh ṭha lo kan hmuh reng lai pawhin lo ngawih bo mai chu mi tak leh mi dik nihnaah kan ngai tlat a, mahni dikna ngei ngei pawh han au chhuahpui chu mi chapo hnaah kan ngai vek tlat a, sualin kan biang lehlam a ben chuan, kan chhiatpui rak thlenga a duhtâwka a ben atan kan biang lehlam kan dawh leh mai ṭhin. Isua a thih thlenga ‘a tlawm ral raihna' chu kan tuipui a, mahse chu ‘tlâwmna theology’ chuan Isua mizia ang lo takin sual pawh haw ngam lo leh do ngam lo khawpa tlâwmnaah min hnûk hniam leh ṭhin si! 

Amaherawhchu, dik nia kan inhriatna zawng zawngah kan au chhuakin kan ṭang ṭung tur tihna a ni vek lo va, thil ṭha lo nia kan hriat zawng zawngah kut thawhin kan che nghal rap zel tur tihna a ni hek lo. Fing leh fim takin, dik leh dam takin, mahse nem nuak leh tlawm dui ni si lovin a awm theih a ni. Rev.Zairema kha pa ti thawt thawt emaw pa ṭawngkam ṭha duam a ni lo va, chuti chung chuan nun tlâwm tak nei chung siin eirukna leh hlemhlêtna awm ṭhin kha a hunah chuan a do rap rap ngam tlat. Rev. Thansiama pawh kha nun tlawm tak nei chung siin tuman an tuk dawl thei lo; a hunah chuan dik nia a hriat chu a sawi chhuak mai ṭhin. 

Heng kan rawngbawltute'n a huna huaisen taka sual an do lai hian ṭhenkhat chuan, “Pastor ve si/rawngbawltu ve si” titein an hnung lamah an sawi duh ṭhin. Pathian rawngbawltu, Isua mizia chhawmtute an nih avang tak hian huaisen taka sual do ngam an ni zawk asin! Charles Spurgeon-a chuan, “I Lalpa an khenbehna khawvel hian a chawimawi che i ring em ni? ” a lo ti a. Thudik leh thutak ṭantute hi chu eng anga mi zaidam leh ṭha pawh ni se tute emaw huat an hlawh lo thei lo. 

He mize danglam nei tur hi chuan mihring huaisenna piah lamah Pathian aṭanga chhuak huaisenna a ngai a, dikna duh mi leh thutak ṭana ding tlat ngam, tlawmna nun nei chung si a hneh theih loh nun changtu nih a ngai. Chung chu Isua kaltlanga chan theih leh Isua ringtu apiangten an nunpui tur mizia, Isua’n a lo lantir fo tawh mize ropui ka tih em em chu a ni.