Zan Khawhar Ngaktute Tân

Chau leh chak lo takin, chhâwktu leh chhawmtu nei lovin, kâwla turni leh i nitin hna chu i vui liam ve thei hram a. Hmel hriat leh ṭhian kha zat nei ve dêm dùm mah la, i dinhmun hriat duh tak takna avanga, "Eng nge i an?" tih zawhna i dawn lohna chin pawh kum tam a ni ta. 

Tlai khua ngui ruai mai leh kâwla turni mawi zeta her liam ruai ruai mai te chu i tân tawrh har hle mah se, i tum tawipui leh thei mai ang. Huphurhawm zawk chu, zan hun reh leh riang, tawnmang leh naktuk inkara i awm leh tur chu a ni. 

He zan hunah hian, dam chhung khawsak lungkhama chhunî i chhiar lai hun ai chuan hahdamthlak deuh zawk mah se, i hahdam ve theih hunah hian khawharna namen lovin a ei ral ṭhin thung che a, khawharna khawfîng a chah leh hma loh zawng hahdamna hahthlak zet chu i chang leh dawn a ni. 

A hun ngaiah, a hmun ngaiah, mutmu tuah tumin khum i pan a. Chutiang hunah tawh chuan sisîp hram thâwm a reh tial tial a, rawlthar hawklak zàn vâkte pawh an thâwm a reh duk tawh a, ral leh lama lêngzem hlaa in awi dial dial te an ṭìn zovin, virthli pawhin zah a ngai a, engkim mai chu a chawl ta ṭhuap a. 

Chung lama vàn dum kûl pup maiah chuan chhawrthla a seki vàng a, a sirah arsi an de ṭhat ṭhat hlawm a, tlâng leh rùamte chu a lang paw deuh ri riai a;  chutah chuan, chutah tak chuan a ni khawharna chu zan leihlâwt aṭanga kaihtawha a awm ṭhin ni. 

I hma hun chiang lo tak mai chu i dâwn zui a, hlauhnain i khat a, i tân hlawhtlinna chu eng tak nge a nih hre lo mah la, i hlawhchham dawn nia inhriatna erawh chu i hmelhriat êm êm tawh thung. Beidawnna pen khat chauhva i hnaih tawh laiin, beidawnna hruihrual chuh lo turin i beiseina la zai sîn chu i la chelh ve hram hram a ni a; engtia rei nge i chelh theih dawn tih erawh zawhna chhàn harsa tak a ni tawh. 

I ṭhian ṭha, an ṭhatna i tem phâk tawh lohte i ngaihtuah a, nun hlui hlimawm tam tak hmanga ṭhuizawm ni mah ula, nun thar leh dinhmun thar luahin an awm ve tawh a, hlimna in inṭawm reng a rem tawh lo va, ral khat aṭangin i hriat thiam loh leh tem ve loh hlimna an chan chu pawmpui a, lawmpui mai chu i tih theih tâwk a ni tawh tih hriain, danglamna phurrit chu i koah a innghat leh ta. 

Chu hunah chuan chhûna i vuah ṭhin i hmaithinghawng chu i la thlain, i inhungna puan zar i hlip thla a; tum lo mah la, duh lo mah la, ṭah a ṭul ta tlat ṭhin. Eng thil takin nge tilungngai che i hre ngai lo va, engin nge i mittui ko chhuak ziah i hre ngai hek lo. 

Hmangaihna rawng leh rim tem phâk lo va i awm rei tawh vang nge, hriat thiamna nena i kut chelh a, pawmtu che i neih ngai tâk loh vang; nge ni a, nun awmzia i hloh hnua midang hriat thiam phâk loh finna thuril i taivawn tâk vang ni zawk le? 

Eng vang pawh chu lo ni se, i mal tlatna khawvelah hian i mal lo ve. Nang ang thovin he khawvel khawi laiah emaw hian i khawharna ang khawharna tuara, ṭahpui a, tleipui tlat si mihring an awm ve a; i zawhna ang tho kha mahni leh mahni an inzawt ve ṭhin. 

A ṭhen chu zan hnih-khat atân chauh he khawharna hi an tuar a, ṭhenkhat erawh chu nang ang bawk a khawharna sul tam veipui tawhte an ni e. 

I khawharnaah hian i mal lova ni tih tal hriain mut mu lo tuah la, nak zana heng mite nena khawharna hrui khat invawn za leh hma loh zawng....muttui, mangṭha le. 

"All you who sleep tonight

Far from the ones you love,

No hand to left or right

And emptiness above—

Know that you aren't alone.

The whole world shares your tears,

Some for two nights or one,

And some for all their years."

 (Vikram Seth)