Pathian Ninawm

'Pathian, Pathian' a ninawm, beidawnna sâr a zàm a, mi dang hlim nui riin khawharna leilâwta min hnuh liam lai hian. Pathian hming lam lo hei chena hlim hringmi za tam an awm. Sum pai an chèn, lêng tin an kawp, anni lo liama leilung fa tlum; lungngaihna tem ve nia an inhriat lai pawha duhtu leh duhsaktu dang chuang lo; an mit an hup luih avanga hlimna hmu lo anga inchan ve mai chauh te...a ni, hlimna sang tam chèn a, naktuka hlimna sâng tam chen tuma vawiin mangṭha ṭhinte chu! 

Mahse, keini ve hi, kan nin Pathian tluka hlu eng nge kan neih chuan? Chak lohnaah min lo ngaihsak pawh ni se ka ṭhian, kan chak loh bîk avanga Pathian chakna vawi tam kan tem phah bîk dawn a nih chuan eng nge pawi? Mi dang hlimna hmanga kan hlimna teh reng ngawt tur kan ni bîk lo ve, ti'ang chuan kan hlimna bûk lung khai a dik lo kumkhua dawn. 

Han chhui lêt la, awmzia a awm tawh loh hnu pawha AWMA a awm avanga awmzia a awm châng a awm ṭhin kha. Kan nun awmze nei loah hian AWMA awm lo se, hmân hmânah beidawnna hruihrual kan chuh ve tawh ang...mahse, AWMA kan tân a la awm avangin kan la awm a nih si hi; van lal fa tlum, lungngaihna kâra thlamuanna mak tak chang a, naktuk chelhtu Pathian rinchhan chunga vawiin mangṭha ṭhinte chu!