Khualzin Pahnih

Kalhlen kût chu lungngai leh lungzur takin, hlauthawng tak siin an tling tla ta hrâm a, chhang dawidim telh loh kût hmang chhunzawm chho tur ni mah se ṭum dang angin a tu-a mah chuan phurna an nei lo a. Rom sipai leh an Juda puite inkarah tlazepin an kut tuar thei ve ve an ni tih an hria a, a chhe berah an zui ṭhin Zirtirtu, Israel te chhandamtu tura an ngaih an nghaisak hlum anga tihhlum ve theih reng an ni.

Chutianga rilrua thil tam tak ngaihtuah chung chuan Kleopa nupui Mari chuan an khaw lama haw turin a pasal nena an bungraw tlem tê chu ipah a khung ṭha mawlh mawlh a. Thawklehkhata thil danglam chak lutuk leh thil tam tak thleng thut thut chu a mak tiin hriatthiam har a la ti fan a. Chawlhkar khat liam ta maia beiseina sâng tak nena Jerusalem-a an zui luh kha tunah chuan thlânah zalhin a awm a, thil mak tam tak titu kha engtin nge a thih mai theih? Israel tan eng nge beisei tur awm tawh chuang ni?

An beiseina zawng zawng innghahna, an zui ber chu a unaunu fapa mah ni se a piantirh atâ mi danglam a ni tih hre chiang berte zinga mi a ni a, mi tam takin an hriat hmaa hretu, a thil mak tih a tir aṭanga hmutu leh a ropuizia temtu a ni a.

 Rome sawrkar lak atâ chhanchhuak a, Israel lalram ropui din thei tur khawpa theihna mak neitu nia an hriat avanga a pasal Kleopa nena  an in chhuahsana a remchanna apianga zuitu an ni ta kha a ni a, mahse ṭo ruah ang maiin thihna rapthlak chuan a rawn nang ta thut a, an beiseina chu tunah chuan thlan thim chhûngah a riak ta.

Beidawnna, lungngaihna chuan a hual tuau tuau a, mahse a rilru luahtu dang lian tak a la awm; zing ni chhuah ruala a unaunu Mari leh Mari Magdalini-te thu rawn hawn kha. “A awm tawh lo! Thlân a ruak! A tholeh! ” an rawn ti chûl a, mahse ani chuan rapthlak taka kraws-a an khenbeh lai a mit ngeiin a hmu a, a mitthlaa la châm reng chuan a awihtir thei lo. A thi ngei si a.

Ni e, thihna hi a na êm a, kan hmangaih tak pawh ni mai lo, kan ram-kan hnam chhanchhuak theitu meuh han chân chu a na dawn lutuk a ni tih chu an mittui hian a hrilhfiah zo lo tih a chiang a, beiseina insiam chawpin a unaunu leh Mari Magdalini-te chu an lo tlan haw mai mai nia ngaiin hreh tak chungin an khaw lam pan turin a pasal Kleopa nen chuan an inkai chhuak ta hnak hnak a.

Jerusalem thlang lamah, an khua kal thleng turin mel 9 vel an inchhawm a ngai dawn tih hriain an beidawnna rilru dah kianga intih chak hram hram tumin hma lam an pan zel a. Kûtpui lai a nih angin ṭum dang ang bawkin Jerusalem panna kawng apiangah chuan mi chi hrang hrang an inzui zur zut a. 

A tam ber chu sumdawng an ni a, mahse mi an tam hle e ti lo chuan an khua a har ru tlat si. Bianga thlan fim dir zar zar hru kiang pahin an sabengtung chu an kai a, a tlai berah unau hmel hai hun velah tal an khaw daia khualbûk thlen hman tumin an kal sauh sauh a.

Mahse rilruin a vei miau chuan thup bo reng theih ni si hek lo le, kawng chanve vel an thlen chuan Kleopa zawk chuan a nupui hmel dur tak en pahin, “engkim a tâwp tawh; vei zui lutuk suh, i inti hah mai mai a ni” a rawn ti chhuak a. A sawitu Kleopa ngei pawh chuan a rilru aṭangin thil thleng te kha a paih bo mai thei dawn bik lo tih erawh a inhre ru kar thung.

 A nupui chuan, “theihngilh mai theih a ni lo ang. A thil tih zawng zawng mit ngeiin kan hmu a, khatiang taka rapthlaka thi mai tur kha a ni lo asin! Tukin zinga Mari Magdalini te thusawi kha ka ngaihtuah kir a, ka awih dâwn leh ka rilru a buai telh telh” tia chhang pahin a thlan fim chhuak chu a hru zauh zauh a.

Kelopa chuan chang khelh khawlhin, “an lungngai lutuk beiseina insiam chawp a ni ang ka tih tawh kha. Simona leh midang pawhin an va en fiah anga, an hrethiam mai ang” a ti bak hlur a. 

Mahse a nupui chuan, “khatiang khawp khan thu ropui sawiin thil ropui a ti a, hetianga thi bo leh mai tur a ni dawn em” a la ti hrâm a. Kleopa chu a ngawi vang vang a, a chhâng dawn lo emaw tih hnuah,

“A tir aṭang rêngin hawtu leh hêktu a nei tam a, a chunga thihna rapthlak thleng ta pawh hi thil âwm lo lutuk chu a ni bik hleinem, mahse...”

“Eng nge mahse?...” chhân tuma a kâ a ân leh dawn lai tak chuan kawng sir lehlam aṭang chuan tu emawin anmahni rawn pan phei pahin, “eng thu nge in sawi?” a rawn ti a, aw ri an hriatna lam hawi pheiin tlangval pakhat inkhaithli thler thlawr,  hmai fai tak, nelawm hmel tak hi an hmu a. Mahse an hriat hnu ni âwmin an hre si lo. 

Chutah Kleopa chuan, “tunhnaia thu thang lêng vak tho ania kan lo sawi ni” a ti liam mai a. Chu tlangval chuan, “eng thu thang nge ni a?” a han ti a, Kleopa leh a nupui chuan mak ti takin an en a, Kleopa chuan, “Jerusalem lam aṭanga lo kal i nih ve tho chuan hre awm tak i ni asin.” A awki tlemin a tihniam a, “Kalhlen kût laia an khenbeh tâk zuitute zinga mi kan ni a, tunah chuan awmzia awm tawh lo, kan khaw lamah kan hna ṭul chhunzawm turin kan haw leh a nih hi” a ti chuai raih a.

Tlangval chu thutak hmel puin mahse ṭawngkam vîn tak ni si lovin, “mi â te u, zawlneite thusawi kha in la hrethiam lo cheu em ni? Krista'n chung thil chu tuarin a ropuinaah a lut tur a ni lov'em ni?” a rawn ti chhuak a, Kleopa te nupa chu an hawi â heu mai a, a thutak nge a fiamthu tih pawh an hre thiam lawk lo. “Mi â te u” a la ti kher kher zui a!

An hmela zawhna tam tak awm chu, chu tlangval chuan a hai hauh lo. Chutah an inkarah a inthawlh sauh sauh a, thutak leh tihtakzetin an thinlunga zawhna awm chu a chhansak ṭan ta a. 

Hun hrang hranga Zawlneite'n Messia chungchang an sawi te chu a mal tê têin a hrilhfiah a, Kleopa te nupa chuan‘ka vaibêl’ tih khawpa an lo hriat bel tawh thute chuan awmzia a nei thar ta riauin an hria a, an hriat fiah loh lai an zawt zeuh zeuh a, tlangval chuan dawhthei takin a hrilh mial mial a.

Rinawm taka an zui ṭhin Isua kha, Israel te tan chauha lo kal a, Rome lalram paihthlaa lei lalram ropui din tura an ngaih ang a ni ngawt lo tih an fiah ta uarh uarh a, tun kum 3 chhunga an hriatfiah loh kha chu zinkawngah chuan an hre fiah ṭan chauh a lo ni. Jerusalem an chhuahsan tirha an khawharna leh beidawnnate rêng an hrechang tawh lo. An titi chhunzawm mawlh mawlh a.

Mahse an han dâk chhuak a, khua a lo ngui ruai tawh a, khualzin dang lah khawvar lam arsi angin an tawk pheuh pheuh tawh a, an khua Emau dai an thlen meuh chuan ni a tla fel titih a, khaw thim chuan thihna rapthlak thlen ni kha a hriat chhuahtir uaih uaih a, an zinpui tlangval khan pênsan a la tum zui. 

Chutah Kleopa te nupa chuan inthlahrung takin, “khua a tlai tawh si a, kan in kan thlen zet a, ei rawngbawl leh chu a tlai dawn si a, khualbûk hnai berah hian zanriah tal min kilpui ta che” tiin an chelh a. Ni e, a rûk tak chuan chu tlangval chuan an khawhar a hnem a, Zawlnei thu a hrilhfiah zozaite kha an la ngaithla kham lo tlat a ni.

Chau hnêpin zanriah ei tur chuan ṭhuthmun an han rem fel a, tlangval chuan an eitur chhang chu la kângin malsawm ṭawngṭaina a chham a, Kleopa te nupa chuan mak ti ang reng tak chung siin tih dan phung pangngaiin an lo zawm ve mai a. 

Chutah chhang chu a laiah phel pahin, “hei hi ka taksa in aia ka hlan kha a ni, min hriatreng nan ti ṭhin ang che u”....Kleopa te nupa chu ben harh zawk ang maiin thil hriat chhuah an nei ta! Chu tlangval lam chu an han hawi a, an hriatrengnain a hrilh ang ngeiin chu thu chhamtu chu tu dang ni lovin an zui ṭhin Isua ngei a ni; a hmel ngei chu fiah takin an hmu ta! An mitvai a ni si lo.

Âwih leh âwih loh inkarah, rinna leh rinhlehna inkarah an awm a, mahse an mit ngeiin an Lalpa chu an hmu si. Kleopa chuan “Ka Lalpa...” a ti hman chauh a, mitkhapkar lekin boruakah a thamral ta daih a.

 Kleopa nupui Mari chuan phur tak maiin “A tholeh! Kleopa, a tholeh a ni! ” a ti ta chul a, pindan leh lama mite an lo tlan khawm a, mahse thil awmzia zawh theih pawh an ni meuh lo.

Chutah Kleopa chuan, “Kan zinkawng mi zawhpuitu kha Amah ngei a lo ni. Pathian thu min hrilhfiahnate khân kan rilru a tiharh ka ti rêng a ni! Ti rawh i let vat ang. Midang kan hrilh a ngai. Tukin zinga thil thleng kha a tak ngei a ni...tho rawh i kal vat ang” tiin a nupui bânah a kaia, an bungrua pawh chuh tawh lovin an sabengtung nen zan thim hnuaiah hah leh chauh sawi lovin hlim takin ‘Tholeh Isua’ an hmuh thu sawi tur chuan an inkai chhuak leh ta nghal a. 

Amah zuitute zinga thawhlehna awmzia hre hmasa berte zinga mi an ni tih leh, khawvel awm chhûng zawnga sawi hlawh tawh tur zinkawng an zawh a ni tih rêng an hre phâk mawlh si lo.