I Tân Leh Ka Tân (Open Letter)

Ka ṭhian, kan kum a tam ve telh telh a, mawhphurhna kan kohvah a inngat tam ve tial tial chu a nih hi tiraw.  Kum hi tam ve telh telh mah se, nun fel leh ṭha neih hi a har telh telh thung si a nih hi! Pathian kohna aw ri hi a lo mawi vek lo a ni tih hi a mi kohna kan tem ve tlem têah hian kan hrethiam ve ṭan a, Kohhran hi ropui mah se, a mi koh-hranate erawh hi chu kan ropui lem lo a ni tihte kan han hre chhuak a, kan mi ngaihsan em em te paw’n nun ngaihsânawm loh an lo kawl ve vek a ni tih te kan hre thiam ve ṭan mek chu a nih si hi.

 

Mahse ka ṭhian, I ngaihtuah ve ngai emaw, Kohhran hi mi fel, taima, inpe leh sawiselbote chauh telna tur lo ni ta se nang leh kei hi chu engtikah mah kan tel thei awm si lo va! Pathianî leh Pathianî inkarah hian kan ât bîk vang nge, chhandam ngai kan ni tih hi kan lo lantir nasat bîk ṭhin avang hian Kohhran leh a chhehvelah hian tel tam kan inthlahrung ṭhin a, kan tlinlohna hi a tlin bîk êm avang hian kan rawngbawlna pawh kan ral thlir leh mai ṭhin a nih kha.

Chak lo leh châk lo chungin kan pên chhuaka, huphurh tak chunga kan tih tur kan hlen chhuah chang pawh a awm ve ta nawk mai (a beitham nangin Pathian hnaih phah awm ve tak ang maw tiraw?)

 

Mi dang kan han sawisel leh mai ṭhin pawh hi a chang chuan keini aia ṭha zawkah kan lo ruat rûk vang leh mi ṭha nia kan hriat anga thil ṭha an hnen atâ kan lo beisei rûk, kan beisei ang kan hmuh leh si loh vang te pawh hi a ni zawk hial mahna. Mahse keini zawk hi vawi engzata tam mi beisei pha lo ang maw!

 

Engpawh ni se, min ruattute ruat leh chhawngtu Pathian hi en fo zawk ila. Keini chuan  mimal, kohhran, kan sawiselate leh min sawiseltute rawng kan bawl lo va, Pathian rawng kan bawl zawk a ni tih hi kan hriatreng loh lai pawh hian theihngilh lo ila. Biakbûkah silhfen mawi ber ber hak tur nei lovin, sum leh pai tam hlan tur nei ve lo mah ila, thinlung kan nei chhung chu, kan neih ve chhun hi hlan ve char char phawt mai ang.

 

Mi dang chuan min teh tling ngai lo mah se, min Kotu hi a tling tawk a ni tih hriain hma lam pan ve hmiah hmiah mai ila. Kohhran leh rawngbawlna pawh mi neinung leh changkang deuh te telna leh tih tur anga a lan dâwn hial châng pawhin, kan hausakna leh changkân ve na chhun Isua hi hmachhuan ve ngar ngar mai ang. Tlûk leh tlâk kan fâwm a nih chuan, thawh leh din kan fâwm dawn tih hre tel ila, a hnung berah tlân mah ila, min Kotu aw ri kan hriatna lam apiangah chawl lova kan tlân ve chhung chuan kan thleng ve em em ang.

 

Tling loh leh tlin loh châng nei mah ila, kan tlin lohna laiah Isua hmangin inteh tling ila; insel châng awm mah se, kan insel zawh ruala, kan pindan chhungrilah kan inṭawngṭaisak tawn chhûng chuan keini mi chak lo hi, Kristaah chuan mi chak kan ni reng ang.

 

Ka ṭhian, ni e, kan vak bo leh ṭhin; mahse kan bona ram pawh hi Ama siam a ni hi; kan bo rei ngai lovang. Chuvangin, Ama ṭhatna avang zawka “I ti ṭha e” tia min kuangkuah nî a thlen hmâ chuan, hmalam i pan hram hram ang aw.

~gba