Pathian Chhinchhiahna

Isabelita-i'n thawnthu danglam tak mai min hrilh a. Putar, ziak leh chhiar thiam lo hi zan tin mai tih takzetin a ṭawngṭai mual mual ṭhin a, chu chu sumdawng hausa tak mai chuan mak tiin thil hriat chian châkin a va be ta a.

 Sumdawng pa chuan, “engtin nge tih takzetin i ṭawngṭai ziah theih? Ziak leh chhiar i thiam si loh chuan Pathian thu i chhiar thei awm si lo, Pathian a awm leh awm loh pawh i hre thei tak tak dawn em ni?” tiin a zawt a.

 Putar chuan, “hria e, ka hre thei asin, Pathian ropui tak thuziak zawng zawng hi ka chhiar thei a ni” tiin a lo chhâng ta mai si a, mak a ti angreng hle mai a.

Sumdawng pa chuan mak ti tak chungin, “chu,  engtin tak chuan maw i chhiar theih a?” tiin dilchhût takin a zâwt a. Putar chuan, “hmun hla tak aṭanga lehkhathawn i dawnin a ziaktu chu i hmelhriat a ni tih engtin nge i lo hriat thei?”

 “A kutziak awmdan hmangin” tiin sumdawng chuan a lo chhang nghal var a.

Putar bawk chuan, “a ni leh tlereuh mawi tak i dawnin engtin nge a siamtu i hriat nghal theih?”

“A chhertu'n a kutchhuak chhinchhiahna a siam ṭhin aṭangin”

“A nih leh engtin nge puan in hnaiha ransa lo kal chu beram emaw, sakawr emaw, bawng emaw a ni tih i hriat theih ṭhin?”

“An ke hniak aṭangin” tiin a lo chhâng leh a.

Tichuan putar chuan pawn lamah chhuahpuiin, van lam chu en turin a hrilh a. Chutah van lam en pahin putar chuan, “a nih leh hei hi min chhâng teh, van lama thu inziak zawng zawng te, lei lama thu inziak zawng zawngte nen lam hian mihring kutchhuak mai a ni thei dawn em ni?”

 

(He thu hi Paulo Coelho lehkhabu “Like the flowing river” tih aṭanga lak chhuah a ni.)