Tawnmang Thâmral

Tuipui emaw lui kam emawa ṭiauvut kan han ṭhâm a, kan kutzungṭang kâra an relh ral leh vek ang mai hian, kan nun timawia tihlimtu, ngaihawm leh ngainatawm; kan nun ti ngaihnawmtute chu eng kan ti nge ni, rei chelh thei lovin an liam zel a, kan chatuan thuthlunte chu a thlungtute dam chhhung chanve pawh an dam thei lo a nih hi maw.

Kei ang bawka mahnia bul ṭan ṭhat zir leh fo hi engzat tak awm ang maw? Maltlat nun zir zo thei reng reng lo, khawharna te'na an bawh buaia an bawh bet tlat; huho nuna tel ve tûr leh a ṭhiang tala vâkvai tur ni si hi, a riangin kan vâkvai leh tlat zel a nih si hi. Ṭhenkhat hi chu heti mai hi kan ni a, kan heti mai mai fo zawng a nih hi. 

A chhan leh vâng zawng lo leh dâwn lo bikah chuan min dah lo la; hria ni ila, thei ni ila, liam turte chu chelhin mi fate angin hlimna chu kan sum tualah a vawk lal lèn ve ngei ang. Mahse, he kan nun leh kan duhthusam thil, chatuan atâna chelha vawn reng kan duhte hi mumang anga chiang lo ruaiin, mit khap karin an thâmral leh mai ṭhin chu a nih hi.

A liam tate tihsual nge, keiin chelh dan tâwk ka thiam loh vang? Keimahah hian duh tâwk an hmu lo fovin, an zawn muanna leh hahdamna chu kei hian ka lo neih si loh avangin an thutiam leh puan thuah telin an puan in an sawn leh vang vang mai ṭhin a nih àwm hi maw.

Eng nge mi neih ang ka neih loh bik a, mi tih ang tih loh ka neih tiin han inhrosa dâwn ila, mi neih ang ka neih phâk loh leh mi tih ang ka tih theih loh a tam mai si a; hei vang hian hringnun lamkawia ka tawh te'n an chhùnmang leh duhthusam an hmuhna tur mihring ka nih lohna an hmu thiam ṭhin a ni chêk ang chu, zinkawng hran zawh tumin an hmanhlelin an nghakhlel thuai a, ka tàwnah an tawnmang a thâmral a, an liam rualin ka tawnmang a thâmral ve nghal ṭhin a nih hi.

Nun hi a lemin a ho zo va, engmah reng hian chatuan a daih lo va, kan ta neih thil leh kan ta chei tawh nun leh hunte hi kan kutah an lo awm hauh si lo. Tak ram kan din hi mang ramah an chang a, chutah lungmawl beiseina nen mang ram dang kan din a; chu kan din khawvel chu, a ngai tè bawkin a takna hloha tlu sawpin, tawnmang mawl a nih kan fiah nawn leh ṭhin.

A ni, kan duhaisam nun leh khawvel chu zingṭian mumang angin kan mang lai rengin an tham ṭhin a nih hi.

Hêng hunah tak hian American poet Edgar Allan Poe-a poem lar tak mai, 'A Dream Within A Dream' tih kha ka hre chhuak vawng vawng ṭhin.

"I stand amid the roar

Of a surf-tormented shore,

And I hold within my hand

Grains of the golden sand —

How few! yet how they creep

Through my fingers to the deep,

While I weep — while I weep!

O God! Can I not grasp

Them with a tighter clasp?

O God! can I not save

One from the pitiless wave?

Is all that we see or seem

But a dream within a dream?"

Ni e, he kan hringnun, mak leh mawi, khawharthlak leh lunglènthlak tak mai hi, tawnmang mawl inthuahthîp, tawnmang thamral mai a lo nih àwm hi maw.