Letter

1 Nov, 2025

Nau,

Keimahah hian zawhna tam tak a awm a, a chhânna hriat ka duh a, mahse a chhânna chu hmu ta ila, ka zawhna neihte aiin min uai rit lehzual zawk ka ring a ni. I kiangah awmin, i bula titina hun nei ta ila, ka rilruah thil tam tak a awm avang hian sawia zawh ber tur che pawh ka hre chuang hauh lo ang. Nang hma lam pana i liam vang vang tawh laiin kei chu niminah ka la táp kual a, kan hun hman dunte kha 'hmanlai' an chan phal lovin, nitin ka chelh fan fan asin. 

Rilru leh a takin hmun hlui ka fang a, chu'ng hmun hluite chuan ka rilru an ti thar em em thung a; finna leh hriatna duha um ṭhin, lehkhabu za tam chhiara hringnun awmzia chhût thiam tum fo ṭhin mihring hi tun hunah hian ât khatin ka â a nih hi! He khawharna ruamah hi chuan ka paltlang tawh leh ka hriatna khawlkhawm tawh te'n awmzia an nei lo ve.

Tlai ni nêmah nang nena sulhnu kan neih tawhna apiang ka fang a, i awmna nia ka hriat hmun chu, veng kilkhawr a ni emaw, veng laili a ni emaw, nang hmuh fuh che inring tak leh inring ngam tak tak chuang si lovin ka tlan kual a, aw chhuah si lo hian ka au che a, ka hawi ruai a, mittui dang kir chungin kawtthlerahte hian chhungrilah ka ṭap ṭhin.

Ni tla tur mawi tak mai te, van zawla vamur thlawk sup sup mai te, ni zungin a chhun phâk china chhum sen phût mai te, dam diaia thlifim lo thaw heuh heuhte hi ka tuar zo ṭhin lo va, an mawina hian min ti nâ a, mahse ka thlir kham thei lo; chutiang chu nang ka hriat reng ṭhin dan che pawh a ni ta. Ka tân natna i chang a, mahse ka thlah thei si lo che a, suangtuahnain natna ka insiam chawp mai mai a ni tia ka inhrilh lawm lawm chung pawhin, ka sim thei tlat lo. Sim chi zia-zâng a ni lo ve.

Tlai boruak hi chu ka tuar nem thei mai a, mahse nau, zan hun lo thleng leh tur mawlh mai hi ka va huphurh ṭhin ve! Zan hun sei leh rei takah hian lunglenna leh khawharna ten min delh zankhua ṭhak ṭhin a. I awm lohna khawvelah hian ruak huaia inhre chung si hian ka tâwt em em ṭhin thung. Ka chapona leh mipa ka nihna hmachhuanin mittui far tur chu ka dang ṭâng ṭâng zel a; mahse, "mipa chu an ṭap mai mai tur a ni lo" ti ṭhintu ngei hian zan khawharthlak takah, zah pawh dawn lovin ka ṭap leh mai ṭhin. 

Mipa tih atana mawi lo khawpin ka tuar a, a puitling zawk awm dân tura mawi lo khawpin kan nun liam ta kha ka sûn a, a zia lo mang e! Heng thil hi ka vawi khat tawnna a ni hauh lo va, tu tu emawte chu an duh vang rênga ka thlah liam tak te leh ka duh vang rênga ka hnar liam takte an awm ve tawh a; thlah liam tâk nih aiin a thlah liamtu zawk kan nih teh fo avangin lungngaih rit phurh pawh thiam tâwk ve hleah ka inngai tawh.

Mahse, Nau, eng vângin nge nang ka thlah che hi heti taka ka tawrh mai le? Kan dinhmun hi inthleng ila, a àwm ang zawk fê asin; mahse, hma lam thlir thei lova nun ngui leh nguai neitu chu kei ka ni zawk tlat si. Mahse, hetiang reng hi ka ni bik dawn lo tih chu ka tawnhriat aṭangin ka hre thiam tawh a, pawm thiam a, theihnghilh hun ka la nei ang. I hming leh i rim, kan sulhnu leh nunhlui te'n thinlung an khawih nep deuh hun a la awm ang a, nileng zan khuaa vawi khat mah hriat chhuah hauh loh hun che pawh a la thleng ang; mahse, tun atan rih chuan 'a hun lai a ni alawm' tia inthiam chawpin tawrh ka duh a, kan hun liam ta te kha mitthi sùn hlawh lo ang maia sùn nawn fo ka duh rih a ni.

Nau, en teh saw, kâwlah ni a her liam mek a, chhûm karah ni zung mawi takin a êng sen phût a, khua a thim riai riai a, mi an insul pel sup sup a, mi tin hi an hlim em em vek mai niin ka hmu a, kei erawh chu, a ngai tèin, lunglênna leh khawharnain ka khat a ni.

"Khua a tlai a, van a ngui a,

Kâwl a thim a, ni a liam a,

Zan a lo thlen a, van a thian hian,

Lungrun, nang ka ngai ṭhin che,

Lungrun, nang ka ngai ṭhin che"