Letter

7 Nov, 2025

Nau,

Zanin chu Dawhkàntê Café-ah ka ṭhian ṭha tak pahnih hruaiin Zirtawp zan hun thawl nuam kan hmang ho a; tun hnàia ka hun hman tawhah chuan nuam ka la tih ve ber a ni a; anni kiangah chuan a nuih loh theih loh a, nuih satliah pawh ni lovin, thinlung takin ka nui thei ṭhin. Mahse, tun atan chuan a harsa.

Zirtawp zan hian engtin emaw tak danglamna riau hi a nei ṭhin a, 'Zirtawp' a nih ang hian kar khat chhûnga zirna in kan kal tâwp nî a ni a, kan hahchawlh ve theih hun a inṭan a, mawhphurhna leh hmabak awm te'n min delh ru deuh rùn nain, zalêngtin rilru hi a zalèn ru riau thung. 

He Dawhkàntê Café hi ka ṭhian ṭha tak pakhatin min kawhhmuh aṭanga ka hriat a ni a, a hmun a remin a nuam a, ka zawngchhang laklawh a, ka kal ve ta fo mai. Zirtawp zan a lo inher chhuah apiangin ṭhalai rual eng emaw zat chu fuan khâwmin he Dawhkàntê-ah hian an hringnun lian leh zau tak, ril leh thûk tak chu an ṭhetdarh ṭhin a. Dawhkàntê hualin taksa leh rilru inhnaih taka thukhawmin, in tur lum leh dài, thlum leh khàte dawm zain an nun nuam leh lum, a thlum lai leh khà laite sawiin rilru hmun khatin an awm ṭhin.

A kawtkâiah khawpui hmachhawn zâwng emaw, hnuchhawn zâwng emawa ṭhuin a ṭhen an nui ri leh hak zel a, a ṭhen kil khatah an titi melh melh a, rilru cho phur tâwk lekin hla leh rimawiin min awi a, kil khata mittui nena rilru lo bun ruak mek te, fiamthu ho tê tê sawia an rit phurh chhâwk zângkhaia awm mekte hmuh tur an awm fo a. He Cafe-culture hi sawisel ṭhin mah se, ṭhalai tam tak tan kan therapy chi khat a tling. 

Chutiang chuan Dawhkàntê-ah kan hringnuna thil thleng lian tak takte chu kan bun chhuak ṭhin.

Nau, chhûm a zîng deuh chûk nain, van lam chu a thiang khâk mai a, thla êng pawh a mawi leh kher mai. Chutah ka hla duh êm êm mai an rawn play a, C. Vansanga aw thâm chàl mai chuan,

"Zantiang chhawrthlapui a lo èn hian,

Thinlaiah i thar leh ṭhin.

Eng dang dàwn zai rêng ka rêl thei lo,

Nang lo chu, duhlai mi û;

Nang ngaih lunglèn a zual e"

Ka inrin hman hmâin a hla thu chuan min nghawr a, ka rilru a chawk tho a, ka zâm a zal raih thung a, ka mitah mittui a inkhawl khawm ru leh ṭûn tawh a, ka dang kir a, titi tluangtlam a chawl a, nang ngaih lunglèn a inṭan thung.

"Chhawrthlapui leh siar zawngte khian

Thangvan sâng an màwi ngei e;

Kei ka di tawn hnu pawh vul zel se,

Thinlai nâ a dam ngei ang

Tiin duhthu ka sâm ṭhin"

Nau, kei leh hêng zèmtu zai hla phuahtute hi kan hma kan sial mang e ka ti! Kan hmangaihte chu an hlim kan duhsak a, mahse kan tel lova hlimna ni lovin; hringnun phêk thar kai zel turin kan duhsak a, mahse ziakfung chelhpuitu nih kan la duh fo a. Nunhlui kalsan a, hma lam min pansan hnuah pawh kan nunhluite chu kan chelh fan fan a, nunhlui a chan phal lovin thinlungah tal vul nawm tir kan tum fan fan ṭhin.

Hei hi hmangaihna nge hmasialna? Hmangaihtuin hmangaihte hmâ a ngaihnaah hian, hmangaihtu ber chu a tel ve a rem châng tawh si lo maw? Eng vangin nge i kal a ngaih tlat a, ka tel lo va hmangaihna leh hlimna chu neih i duh tlat? Eng vangin nge a rem tawh loh a, eng vangin nge kan thawnthu mawi tak chu thâwklehkhata tih tâwpa a awm a ngaih?

A chhànna âwm ang, dik hmel tak, ho tak si chu a awm a, mahse chu chu ka pawm thei lo. Kan thawnthu tih tâwp nan thu tlingah ka ngai thei tlat lo.

Ka ṭhiante chu kan intawn dan leh bul kan ṭan dante a ṭhen azar chu ka sih hmuh a, nang ka hmuh dan leh ka duhna che pawh; mahse a mawina leh a takna chu keimah chauhin a ni hre thiam tak tak ni. Thla a êng telh telh a, kei ka mang telh telh a; ka ruak huai a, ka tâwt êm êm lawi a. He ka thil tawn hian eng zirlai mah min zirtir rih lo va, eng philosophy ṭha mah ka chherin ka nei lo va, neih ka duh nahek lo. 

Ka duh zawng chu nangmah leh kan nun kha neih lêt leh ka duh a, chu tê mai chu a ni a; a mawlmang a, a mawi ka ti. 

Naupang ang maiin ka rilruin Pathian chu kan nun kha min pe kîr leh tûrin ka ngèn ngawt ngawt a, ka ṭah-awh a; theih ni se a kawrfual hmâwra pawh a, "khawngaih takin" tia ngen lawm lawm mai ka nâp. 

Mahse, nau, Pathian chuan tumah hi mi hmangaih tur leh duh turin a tur lui dawn lo va, duhthlanna min pêk miau avangin kan duhthlanna min zahsak a, kan duh zâwng kan thlan a phal a, kan duhthlan hringnun chu kan zawh ṭhin. I duhthlanna te'n ka lam an hawi tawh miau loh chuan, Engkimtitheia khian engmah a ti thei lo va, keiin tih theih ka nei lo lehzual. 

Nau, tute emaw chuan, "if it's written for you, it will travel across seven heavens only to end up in your hands" an lo ti a; mahse thangvan thuah sarih leh khawvel pasariha hlâ a ni emaw, pên sarih leka hnaiah emaw pawh awm la, i hringnun ziakfung chu nangman i chelh a, i duhthlanna ngeia ka hnêna i lo tlan kir a nih si loh chuan, chatuanin kan hrang tawh ang.

Zan a rei telh telh a, hla min hlui mawi telh telh a, a tâwpah ka rilru hria ni àwm hrimin an hla thûl khung nia lang chu min hlui a; tun hnàia ka hla ngaihthlak nasat ber a ni nghe nghe. November thla zan khaw vawt var mai karah chuan hmeichhe aw mawi tak a lo ri a:

"Hai hian ka ring bik lo che,

He thinlung neitu i ni tih hi;

I lungdum zoa'n ka theih tâwk a tling zo lo maw?

I zùn ngaih lunglèn reng hi

Hunin a liampui theih beiseiin,

Damchhung nî chhiar dan 

ka zir zawk mai ta'ng e"

Ni e, Nau, hunin a liampui hun a la awm ngei ang; mahse he hun hi ka tan chuan thla hnih- thum lek a ni ve lova, chatuan tluka sei a ni ngei ang. Mahse Khuanuin zah a ngai ang a, i tel lohna hringnunah thinlung taka nuih dan ka zir thiam ngei ang.

"Thawnthu ngaihnawm nei ila,

Tia suangtuahna ka sèn ral te'n,

Tak ram thlen zai an rel lo,

Ka ngaih bàn che a ṭul ta e"