Letter

4 Nov, 2025

Nau,
Puitlinna leh kum lama upatna hian rilru lungnona (emotion) a ti bo telh telhin, thil thlir thiam tawhna avangin thinlung vawt leh khauh kan nei telh telh turah ka ngai ṭhin a, mahse ka lo ring sual a ni.

Hringnun hi a hma aia thûk zawkin ka tem a, ka la runin, ka la thutak telh telh zawk niin ka hria. Ka thil ngaihhlutte leh ka nun khawihtu thil ho lam tê tê nia lang thleng hian ka vohin ka hauh tlat a, hringnun hunbi avang leh an duhthlanna avanga ka kut atâ an relh bo pawhin, hriat rengna hmangin ka chelh ngar ngar ṭhin.

Hei vang hi a ni ang, kan rual û, nu leh pa, pi leh pute'n khawvel danglam chak tak karah pawh, an thil duh leh ngaihhlutte chu hluiin ṭhing tawh mah se, an hriat rengna leh an thinlung duhzâwng chu nghet taka suihzawm a nih tawh avangin, an duhzawng thilte chelh nan khawvel inher danglam zel pawh an cho lêt ngam ṭhin a nih hi.

Tun hunah zel chêngin nung mah ila, keimahni min nihtirtu zawk chu kan hriat rengna hi a lo ni.

Nau, hmangaihna kan tih pawh hi hriat rengna hi a ni asin. Mi hi kan hmuh dan, kan hriat danin kan hmangaih a, chu hriatna chu a ṭhang zel a, kan hmangaihte nihna tak tak ni kher lo, ni-a kan hriat tawh behchhanin kan duhthusam thilte pawh kan hmangaih mihringah chuan kan bel tel fo va; thlir a nuam a, a mawi a, a hlu a ni. Chu'ng kan hriat rengna chu a ni kan hmangaih chu; a tak leh a tak lo te nên lam hian.

Kan hmangaihte an kal bo emaw, kan hriat reng dan anga an awm tak loh emaw chiah hian, kan rilru a na ṭhin a, a mak kan ti ta ṭhin a nih hi. Hun hian mihring nihna leh nun hi a thlak danglam fo a; kan hmangaihte pawh hun chuan a thlak danglam ṭhin. Chuvangin, kan hmangaihna chu ngai reng mah se, hmâna kan mi hmangaihte erawh kha chu an ni tawh ngai lo. Mi thar leh mi hrang hlak, kan tel tawh lohnaa khat tawnhriat thil ten a siam mihring an lo ni tawh ṭhin a, an hming leh hmelte chu hre chiang em em mah ila, hun tam a liam hnuah chuan hriat ngai loh mi hrang, kan hmangaihte hmel ang pû an lo ni chauh tawh ṭhin.

Nau, he thil tak hi alawm, ka lung tichhe ṭhin chu. He thil vang hian alawm, ka hmuh phâk loh leh hriat phâk lohva i liam tur chu ka phal loh ni. Nitina hlim taka ka biak fo leh zan khaw tairêk thlenga inawm ṭhin kha, ka hriat ngai rêng rêng loh mi i chang tur hi ka ngai ngam lo va, hriat rengnaah chauh hmangaih che lah ka duhtâwk hek lo.

Ṭuanna tlâng a dan a, lêng dang sulhnu i nuna a khah hnu chuan, engtin nge ka hriat theih tawh ang che? Kum sul tam a liamah lo intawng leh ta ila, ka hriat rengna che nen hian ka khaikhin ngei che ang a, chu ka hriat rengna chu nangmahah bel ka la tum fan ang a, mahse ka hriat ṭhin nangmah kha, kha mi kha i lo ni tawh dawn si lo. Chu huna rilru natna chu ka phur lâwk a ni.

Engtin nge ka tih tak ang le? Pawm thiamna nen ka kal bo ang maw? Heng hriat rengnate hi ka paih bo tel ve thei dawn si lo. Nang ka hriatna ril tak hi a mawi ka tih êm êm rualin, ka tan phurrit an chang tawh ang a, hriat rengna hlimawm hi ka ṭahpui fo dawn asin.

Mahse, i hmaah khawvel a awm a, tem tur leh tawn tur tam tak i la nei tih ka hria a, khawiah pawh kal turin zalènna i nei a, chelhin ka dang lui thei lo che tih pawh ka hria e. Mahse, Nau, he khawvelah hian, he hringnun awm chhûng chu mi thar leh thil thar i tem duh chuan chu'ng chu khawi hmunah pawh i hmu thei zel ang; mahse, i hah a, i chauh a, i hringnun phur a rih zual a, hmangaihna i zawng nawn a nih chuan, i hriat sa hmangaihna hi rawn zawng leh ang che.

Danglamna tam tak nei tawh dawn mah la, ka tan hriat loh mikhual i chang ngai lo vang. I hriat sa hmangaihna hi i tan ka vohin ka hauh tlat dawn a, kum upate'n khawvel inher danglam chak tak pawh cho lêt ngam khawpa an thil ngaihhlutte an chelh fan fan ṭhin ang hian, Nau, ka hriat rengnaah ka lo chelh fan fan ang che.

Hma lam pan lo va, lungngaia indawm kun reng ka tum tihna ni lovin, nang nena kan siam he hmangaihna leh hriat rengna hi khawiah mah a thlakthlengna emaw, a aiawh zo emaw zawn buai ka tum lo va, a awm theiin ka ring hek lo. A danglamin a dangdai a, a mawiin a hlu a ni. He khawvelah hian vawi khat chauh ka piangin ka dam dâwn a nih si chuan, heti ang hmangaihna hi nang nen a nih ngawt loh chuan tawn nawn ka zuam lo ve.

Nau, if it's not you,
May this kind of love never find me again.