Letter

6 Nov, 2025

Nau,

Vawiin chu ka pain ruah sur cherh cherh kârah a sana hlui leh ka pu sana hlui a la siam ṭhat theih beiseiin sana siamna dâwrah min tîr a. A sana zawk chu hmâna a ṭhianpain eizawnna bul a ṭantirh ve laia a hnathawhnaa a hman atana duhsak taka a pêk a ni âwm e. A sana hming enin a hun lai chuan a man to pawl tak a ni ang tih a hriat theih a, a hmai a râng deuh ruai tawh a, a thihna pawh a rei tawh tih a hriat. A bân invuahna lai a chhe tawh a, vuah leh tur chuan engtin emawa siam ve fê a ngai dawn tih a lang reng mai; mahse ka pa chuan a siamna manah sèn ngai ang ang pawh sèng hreh lovin min kentir thung. 

Tichuan, dâwrah chuan ka han keng a, chu sana dinhmun leh siam ṭhat theih dàn a awm chuan siam ṭhat hram kan duh thute ka sawi a, min ensak nghal a. Rei lo têah chuan a sana siamtu ber chuan, "Ê khai! Hetiang hi chu a siam ṭhat theih tawh loh ang, a ngaihna a awm lo" a rawn tichhuak hlut a. A ṭhianpa dawr lo nghak vetu tho chuan dawhkana rawn theh thlak pahin, "Ṭhianpa, a hlui tawh lutuk a, siam ṭhat tumin awmzia awm lo ang, a thar lei la, a la hlawk fe zawk" a rawn ti ve bawk a. 

Sana chu siam tumin a bei leh dawn emaw ka tih lai chuan a ṭhu fel ta thek a, kei chuan ka lo nghak veng veng a, chutah ani chuan, "kha, ṭhianpa, la rawh" a rawn ti a, inthlahrung tak chuan, "han tih ngaihna vak a awm ngang lo a ni maw" ka han ti leh hrâm a, sana chu ka iptêah ka khung ṭha ta a; ka khung lai mek pawh chuan, dawr nghak tlangval chuan siam ṭhat aiin a thar lei a hlawk tawh zawk thu bawk chu a rawn sawi leh suam suam a, eng danga chhâng lo chuan, ṭha takin lawm thu ka hrilh a, dawr chu ka chhuahsan ta a. In thlen hunah, ka pa hnênah a siam ṭhat theih tawh loh thu hrilh erawh ka hreh ang reng hle a ni.

Dawr nghâktute'n sana hlui tawh tak kawl reng leh siam ṭhat ai chuan a thar ṭha zawk nei tura min hrilh kha an tih âwm tak a ni a, mahse ka pa chuan a thar ni lovin, kha sana ngei kha a duh tlat avangin kum tam tak hnuah pawh tuai hnûm a, siam ṭhat a la duh a ni. 

A thar duh se chu, hmân hmânah a nei ve daih tawh ngei ang. Mahse, kha sana hlui tawh tak kha a petu leh a petu thinlung avangin a ngaihluin a ngainâ a, a roh a, a voh tlat a ni. A nihna takah chuan sana pakhat ve mai a ni a, a hlui a, a hma a rang ruai tawh lehnghal a, a bân invuahna a la chhe zui. Hnâwl a, paih bo a, hluihlàwn âwm tak chu a ni tawh; mahse, he sana hlui hian nun hlui hriat rengtlak a keng tlat ang a, a petuin mual liam tawh mah se, a petu rilru chu he sana hian a la lantir tlat vang te pawh a ni ang, a neituin kum tam tak a liam hnu pawha siam ṭhat a la duh tlat ni. 

He khawvela thil tam zawk hi anmahni mai chuan engmah an ni lo va, awmzia a hranpain an nei lo. Mahse, mihringte hian awmze neiin kan siam a, hlutna kan pe ṭhin. Kan hlut tak mai thil chu a ang emaw, a tlukpui emaw tam tak a awm ang a, a aia mawi zawk leh ṭha zawk pawh tam tak a awm ang. Mahse, chu'ng chuan kan nun min ṭawmpui ve lo va, kan nun nen inzawmna an nei ve lo va, kan nuna thil thleng tawh an vawngin an lantir ve hek lo. 

Thil-ah chiah a ni lo, mihringah pawh hian a ni. Kan duh tak te'n min liamsanin min kal bosan a, ṭhen leh rualten mi dang ṭha zawk kan tawn leh theih thu sawiin min hnem an tum ṭhin. Mahse, mi dang chu mi dang an ni a, kan nunah awmzia an nei lo. A thlakna leh a aiawh zo tam tak awm ta se, tute mah hi kan hmangaihte kan chàn avangin ka ṭapin ka lunghnûr hauh lo ang. 

Chutih rual chuan, keini thangtharte hian nuna thil hlu takte ngaihhlut kawngah kan rual ûte leh chhuan hmasate hi kan tluk tawh lo niin ka hre ṭhin. Keini chuan ninawm a chan a, hlimna a tlem a, harsatna a lo lan ve leh kan inzawmna chhu chhatin, thil thar, mi thar leh nun thar nia kan hriat kan banin kan bawh nghal zung zung fo a, chu chuan kan nun a ti dazât zo ṭhin. 

Khawvel hian 'the art of letting go' chu zirtîrin chanchin ṭha hril takin hril ṭhin mah se, kan mamawh chu 'the art of holding on' zawk hi a ni. Kan lo chelh hrâm hrâm loh avang te, kan nin avanga kan kal liam mai avang te, harsatna karah pawha kan beih hrâm hrâm ngam loh leh peih loh avangtein thil hlu tak leh kan nuna mi hlut takte kan chân fo va, thawnthu ngaihnawm tak ni tur chu, a lai laklawhah tih tâwpin a awm ṭhin. 

Nau, heng thu ka sawi avang hian ka dem chein a mawh ka phurtir che tihna a ni lo a, kei ngei pawhin tihsual ka nei a, inchhirna te'n min umzui mek a nih hi. A hun lai chuan hriat thiam a harin thlir thiam a har ve bawk a-tin ni. Kan thawnthu kha ti tâwp ngawt lovin lo ziah chhunzawm hrâm hrâm ila, lo chelh hrâm hrâm chein, nangin min chelh hrâm hrâm bawk la; siam ṭhat ngai siam ṭhain, hnâwla thlah liam aiin chelha vawn tlat lo thlang ta zel zawk ila chuan, heti hi kan ni lo tur. 

Nau, kan inthlah liam hma hret a ni; kan thawnthu a ngaihnawm dawn chauh zawk asin.