Chhànna Mawi Ber

Damdawi-in bathlàrah chuan ṭhuin kâwla ni tla tur êng sen phût mai chu a thlir a.

Thlifim chuan a hmel ngui leh nguai tak mai chu a rawn chêm a, van râng chhûm te chuan pianzia fel fai tak mai neiin van zâu tak maiah chuan a zâm cham phei pût a, ni tla tur chuan a èn sen phût reng a.

Chhûm kal delh delh kârah chuan sava rual nuam ti taka thla zâra lêng kàwi vel pawh a lang thei a; khawvel chu siam zawh hlim ang maiin a mawi a, chu hun leh hmun chu a reh dam diai a.

Mahse, chu mawina thlirtu rawlthar thinlung erawh hliam leh ser nungin a khat a, khawharna leh lunglènnain a vaw chau a, ni êng mawi tak hnuaiah a hun thim ber a hmang a; mipui hlim thâwm kârah pawh a mal ngawih ngawih fo va, a chhûngril lam awngrawpna chuan a taksa lang thei thlengin a nghawng a ni.

Dam a thlahlel lova, thih pawh a nawm zawk dawn avanga thlahlel a ni hek lo. Tun hnua awm dan nuam ber nia a hriat awm chhun chu 'awm loh' a ni ringawt mai.

Hringnuna thil thleng fo inṭhenna chuan a hringnun pawh a sawisa ve mêk a, tu hriat lovin mittui a sêng nawn fo va. Mipa a nihna chuan mite laka nêp leh no nih a hlawhtir a hlauh avangin a dan zawh loh mittui chu hmun fâl leh fianrialah a tlànpui a ngai fo a. Nun hlui hlimawm ber ber chuan a vel ṭap a, inveng hman lêk lova hun liam tawha a kîr chângin, hriat rengna hlimawm chuan a tirah nui hmel puttîr ve mah se, chu hriat reng tur hnut chhiahtu nena an tâwp dân a chhui thlen apiangin mittui nen a hnu chhui lai chu a khâr leh ṭhin.

Chu an nun hlui chuan, tuna a nun chu a hlui nawn ta fo a ni.

Duh leh hmangaih taka a lo kuangkuah khan a kalsan rual khan hlimna zawng zawng a kal bopui tel emaw tih turin hlimna chu a tân chuan kâwlkil piah lam thil a ni ta a. Mahse, a nun sawisa nasa zualtu erawh chu beidawng chunga beiseina a ni.

A lo kir leh mai ringin a ring a fân fo va, a ûm a, a au a; mahse, chu beiseina chuan beidawnna rûam thim thûk zâwkah a lo tlukpui leh ṭhin a, ri siam lovin ring takin a rûm tlawk tlawk ṭhin.

Damdawi-in bathlâra amah chauhva rei ngial a ṭhut lai lo thlir rengtu hmeichhia thung chuan nitin-in chu rawlthar hmela lungngaihna chu a lo chhiarsak fo va; a theihtâwpin hlim hmel chu rawltharin a put nawn leh theih nan a tha leh zung a sêng a, zah pawh sawi thei lovin rei lo tè tal pawh a tihnuih theih nan naupang chhia taka lem chan pawh a hreh lo va, a inhuam em em zawk ṭhin.

Hlim taka a awm leh a duhsak em em a, a thei tâwk chu tâwk ti lo hle mah se, a theihna hlan a ṭhulh chuang lo. Khawvel mawina tu emaw zâra a lo hmuh tawh ang kha hmuh nawntir leh a duhsak takzet a; hmangaih let ve a phû a ni tih a hriatpui a, a lo inpumpekna leh hmangaihna a lo luan ral tir tawh zawng zawng chu ama hnen ngeiah let leh se la tih chu a duhsakpui a ni. 

Chu duhsakna chu thil tih hmangin chu rawlthar bulah chuan a lantir fo va; theih se zawng, a natna zawng zawng pawh hìp chhuahsaka amaha bel vek mai chu a nàp a; mahse, chu zawng a thei ngawt si lo.

Thâwm dìm takin zawi muangin chu rawlthar bulah chuan a va ṭhu a. 

Sawi châk leh sawi duh tam tak a nei a; mahse, lungngaihna thâwm reh ruih chuan sawi tur a haih chhamtîr zo va, vawm bo ang maiin a sawi châk zâwng pawh a pil bo leh ta duak a, sawi tur ber pawh hre lovin a ṭhu ngawi ve ta ngawt a. 

Rei vak lovah chuan rawlthar chuan a thlir ngai thlir reng chung chuan awkâ a chhuah ta a, " ka lawm lutuk aw...i thil tih leh i tih chhan te hi ka hre thiam lo a ni lova, ka haider a ni hek lo. Ka phu lovin ka chungah ṭhat i chhuah a, ka lawm takzet...mahse..."

Thil sawi hreh nei tih hriat takin a ngawi leh rân rân a. A ṭawng tawh dawn lo emaw tih hnuah, "...mahse, tunah rih chuan keimah leh keimah pawh ka inhrethiam lova, ka inngaihtuah thei lova, ka chunga i tih zawng zawng hi ka chhâng lêt thei rih lo che a ni".

A kut a hûm ruh a, a khur dar dar a.

"Ka hun kal tawh leh mi hliamtu chu hla takah awm mah se, keimah zawk hian ka thlah thei rih si lo va, ka bula i awm chuan ka nat rualin i na ve fo dawn asin... chutianga awm chu i thei dawn em ni?..."

Sawi chhunzawm tum mah se a hrawkah hnawhtu a awm a, a sawi chhunzawm thei lo. 

A kianga ṭhu hmeichhia chu a thaw halh a, a bianga mittui luang ngiai chung chuan aw nêm dam diaiin, "i nun hlui leh tuin nge hliam che tih a pawimawh ber lo..." thâwk a la leh halh a, aw kur dar dar chungin, "ka hmangaih che a...i dam ang...i dam dâwn alawm. Eng ang nun pawh lo nei la, i bula awm ka duh alawm" tiin chu rawlthar tâna chhànna mawi ber mai chu a pe a.

(This was my first short story, written when i was twenty)